Një konflikt i rëndë është regjistruar mbrëmjen e djeshme në burgun e Fierit, konkretisht në Seksionin 3, kati i dytë i godinës së paraburgimit, ku disa të dënuar janë përfshirë në një sherr fizik.

Sipas informacioneve paraprake, vëllezërit Kiri Mërnica dhe Azgan Mërnica kanë sulmuar një të burgosur tjetër me iniciale K.S., për motive që ende nuk janë bërë të qarta nga autoritetet.

Azgan Mërnica, i dënuar me burgim të përjetshëm për vrasjen e efektivit të forcave speciale “Shqiponja”, Novruz Cenalia, më 13 maj 2024, së bashku me vëllain e tij Kiri Mërnica, i dënuar me 19 vite burg për vrasjen e 23-vjeçarit Florjan Selimi në vitin 2019, janë konfliktuar me K.S. gjatë ndërrimit të turneve të stafit të sigurisë. Kjo situatë ka bërë që ndërhyrja e gardianëve të vijë me vonesë.

Burime bëjnë me dije se ngjarja është mbajtur fillimisht e rezervuar dhe aktualisht po verifikohet nga autoritetet përmes pamjeve të kamerave të sigurisë të instaluara në ambientet e burgut.

Policia dhe administrata e institucionit të vuajtjes së dënimit po vijojnë hetimet për të zbardhur rrethanat dhe motivet e plota të këtij sulmi, si dhe për të përcaktuar përgjegjësitë për incidentin e ndodhur.