Mjaftuan vetëm disa orë shi stinor në Qarkun e Shkodrës që Bashkia e Vaut të Dejës të përmbytej, duke vënë në rrezik qindra banesa dhe jetën e banorëve. Ligjvënësi demokrat Luçiano Boçi e cilësoi situatën si pasojë të papërgjegjshmërisë, paaftësisë, keqadministrimit dhe korrupsionit të pushtetit lokal dhe atij qendror.

Boçi thekson se përroi i Glinës shkaktoi dëme të mëdha, jo për shkak të “sulmit të natyrës”, por për shkak se nuk janë marrë masa paraprake dhe investime për mbrojtjen e zonës. Ai akuzoi kryebashkiakun Shkreli, i cili sipas tij justifikohet se projekti i argjinaturave nuk ka marrë miratimin e nevojshëm prej pesë vitesh nga qeveria Rama.

“Kryebashkiaku justifikohet se projekti është ndërhyrë në argjinaturat e tij, por nga pesë vite nuk ka marrë dritë jeshile nga Rama. Ndërsa qeveria ia hedh topin pushtetit lokal. Ky i fundit fondet i ka shpenzuar për fushatë dhe rrugë zgjedhore, duke lënë qytetarët pa mbrojtje,” shkruan Boçi në statusin e tij.

Ai kërkoi që ndërhyrjet emergjente të bëhen pa vonesë dhe me kapacitetet e duhura, duke paralajmëruar se pasojat e korrupsionit dhe keqadministrimit bien gjithmonë mbi qytetarët.

Boçi përfundon mesazh: “Përgjegjësit e pushtetit, lokal dhe qendror, nuk mund t’i shpëtojnë përgjegjësisë me justifikime dhe ngritje shpatullash. Situata është urgjente dhe kërkon veprime konkrete për të parandaluar një katastrofë të mundshme.”