Shkarkimet intensive të ujit vijojnë prej tre ditësh në kaskadën e Drinit, ku tre hidrocentralet më të mëdha të vendit po operojnë me kapacitete të larta përballë rritjes së prurjeve.

Aktualisht, HEC Fierza po shkarkon rreth 1000 m³ ujë në sekondë, ndërsa HEC Komani dhe HEC Vau i Dejës po kryejnë shkarkime me nga 800 m³ në sekondë secili.

Reshjet intensive që kanë përfshirë territorin që përshkon kaskadën e lumit Drin pritet të rrisin më tej prurjet në tre basenet më të mëdha ujore të vendit. Autoritetet energjetike monitorojnë në mënyrë të vazhdueshme situatën hidrologjike për të garantuar menaxhimin e sigurt të rezervuarëve dhe për të shmangur rrezikun e përmbytjeve në zonat poshtë digave.

Ndërkohë, strukturat përkatëse mbeten në gatishmëri, ndërsa zhvillimet do të varen nga intensiteti i reshjeve në ditët në vijim.