Një grup shqiptarësh, të njohur për precedentë penalë, është shkatërruar nga autoritetet italiane pas një ndjekjeje policore që përfundoi në Porto Potenza. Të arrestuarit u dënuan nga Gjykata e Maceratës me një total prej rreth 4 vitesh burgim, por dënimi iu kthye në arrest shtëpie.

Katër personat e arrestuar, të moshave 39, 32, 29 dhe 24 vjeç, kishin kryer disa vjedhje në zonat e Castel di Lama dhe Monteprandone, duke plaçkitur bizhuteri ari dhe orë luksoze nga banesat. Policia italiane, e cila kishte kohë që ndiqte lëvizjet e tyre, i ndaloi më 28 dhe 29 nëntor, teksa ata po përpiqeshin të arratiseshin me një automjet tip “Fiat”.

Në një seancë gjyqësore të mbajtur më 11 janar, të akuzuarit pranuan fajësinë në një proces të shkurtuar, duke marrë një dënim prej 3 vjet e gjashtë muaj izolim. Megjithatë, gjyqtarja **Françeska Preziosi** vendosi që ata ta kryenin dënimin në arrest shtëpie.

Prokurori Stefano Lanari, i cili paraqiti akuzat në sallën e gjyqit, mbështeti provat që lidhnin të katërtit me krimet e kryera.

Vendimi për t’i kthyer dënimet në arrest shtëpie ka ngritur pikëpyetje për efikasitetin e drejtësisë ndaj personave me precedentë të mëparshëm penalë. Mediat italiane theksojnë se grupi ishte kthyer në një rrezik të vazhdueshëm për komunitetin, duke shfrytëzuar eksperiencën dhe metodat e tyre për të kryer vjedhje.

Policia italiane vazhdon hetimet për të përcaktuar nëse katër të arrestuarit janë të lidhur me raste të tjera kriminale në rajon.