Këngëtarja e njohur Shkëndije Muja ka folur hapur për vendimin e saj për t’u larguar nga muzika dhe për t’u rikthyer te besimi në Zot. Në një intervistë për Dita Jonë në A2 CNN, Muja e përshkroi këtë ndryshim si një hap vendimtar në jetën e saj.

“Kam pasur sfida, por Zoti është gjithmonë në anën e besimtarëve dhe ua lehtëson rrugën. Ai që mbështetet te Zoti do të jetë gjithmonë triumfues,” – u shpreh këngëtarja.

Ajo pranoi se është përballur me paragjykime dhe kërcënime për mesazhet e saj lidhur me besimin, por këto nuk e kanë ndalur. “Ka pasur kërcënime që të ndalem, të mos përçoj mesazhe të tilla, të mos kem influencë te rinia, por kjo më ka bërë të jem edhe më e vendosur,” – shtoi Muja.

Këngëtarja nënvizoi se nuk do të ndalet në përhapjen e mesazheve që, sipas saj, sjellin paqe dhe forcë tek të rinjtë.