Shkodër, 18 Shkurt 2025 – Policia e Shkodrës ka njoftuar për një ngjarje tragjike që ka ndodhur paraditen e sotme, kur shtetasi Kolë Manaj, 34 vjeç, ka qëlluar me armë zjarri të dashurën e tij, Anila Prendushi, dhe më pas ka vrarë veten. Ngjarja ka ndodhur rreth orës 11:15 në lagjen “Mark Lula” të qytetit të Shkodrës, ndërsa të dy të rinjtë ndodheshin në makinë në momentin e aktit tragjik.
Kolë Manaj ka humbur jetën në vendin e ngjarjes, ndërsa Anila Prendushi ka mbetur e plagosur rëndë dhe është transportuar menjëherë në spital për ndihmë mjekësore.
Në vendin e ngjarjes kanë mbërritur shërbimet e Policisë, të cilat kanë nisur menjëherë hetimet për zbardhjen e rrethanave të ngjarjes. Sipas informacionit të parë, nuk janë konstatuar dëmtime të jashtme në automjet nga armët e zjarrit, por në brendësi të tij është gjetur një pistoletë. Grupi hetimor, në bashkëpunim me Prokurorinë, po punon për të sqaruar shkaqet dhe detajet e ngjarjes.
