Në orët e para të mëngjesit të 30 tetorit, dy makina u përfshinë nga flakët në lagjen “Kongresi i Përmetit” në qytetin e Shkodrës. Sipas policisë, automjetet në pronësi të Sabaudin Hoxhës, por në përdorim të Ergys Lohjës, agjent krimesh, u shkrumbuan plotësisht, duke shkaktuar dëme materiale të konsiderueshme. Dyshohet se shënjestra e këtij akti ka qenë vetë Lohja, i cili është vënë në fokus të sulmeve për shkak të profesionit të tij.

Policia njoftoi: “Rreth orës 03:25, në lagjen ‘Kongresi i Përmetit’, ka rënë zjarr në 2 automjete, tip ‘Benz ML’ dhe ‘Kiron Ssanyong’, në pronësi të shtetasit Sabaudin Hoxha. Si pasojë janë shkaktuar vetëm dëme materiale.”

Ngjarja nuk është e izoluar, pasi në Shkodër efektivët e policisë kanë qenë shpeshherë në shënjestër të sulmeve, përfshirë atentate, vendosjen e lëndëve eksplozive dhe djegien e mjeteve.

Ergys Lohja ka një histori të mëparshme incidentesh që lidhen me aktivitetin e tij si oficer policie. Në vitin 2019, ai u pezullua nga posti i specialistit të zonës në komisariatin e Shkodrës për shkak të përfshirjes në një grup fajdesh. Ndërsa në vitin 2022, Lohja u akuzua për favorizim të kultivimit të kanabisit në zonën e Velipojës. Grupi hetimor vijon punën për të përcaktuar shkaqet dhe rrethanat e këtij incidenti.