Një ngjarje e rëndë ka tronditur qytetin e Shkodrës mëngjesin e sotëm, ku një turiste amerikane ka humbur jetën si pasojë e një akti të dhunshëm me thikë, i kryer nga bashkëshorti i saj, gjithashtu shtetas amerikan. Ngjarja ndodhi rreth orës 10:15, në një banesë me qira në rrugën “At Shtjefën Gjeçovi”.

Sipas njoftimit zyrtar të Policisë së Shtetit, viktima, S. S., është qëlluar me mjet prerës brenda banesës ku jetonte me autorin e dyshuar. Në vendngjarje u gjet bashkëshorti i saj, i mbuluar në gjak dhe në gjendje të rënduar psikologjike e fizike.

Burime pranë hetimit konfirmojnë se turisti kishte konsumuar alkool gjatë gjithë natës, dhe në momentin e krimit ndodhej në gjendje të dehur. Pas ngjarjes ai ka pësuar dëmtime të lehta në duar, të cilat dyshohet se i ka shkaktuar gjatë përpjekjes për t’i dhënë fund jetës.

Ai u filmua në momentin e shoqërimit nga ambulanca drejt spitalit, gjysmë i zhveshur dhe me gjak në trup. Aktualisht ndodhet nën kujdesin e mjekëve, por është gjithashtu i shoqëruar nga policia.

Grupi hetimor, nën drejtimin e Prokurorisë së Shkodrës, po punon intensivisht për zbardhjen e plotë të rrethanave të krimit.

Ngjarja ka shkaktuar shqetësim të madh në opinionin publik dhe ka ngjallur reagime për nevojën e forcimit të mekanizmave të kontrollit për dhunën në familje dhe mbrojtjen e grave, përfshirë edhe turistet e huaja që vizitojnë vendin.