Administrata Tatimore ka sqaruar se prindërit me të ardhura vjetore bruto nën 1,2 milionë lekë do të mund të zbritin 100 mijë lekë për shpenzimet e arsimimit të fëmijëve nën 18 vjeç, duke përfshirë edhe kurset e gjuhëve të huaja.

Si do të aplikohet:
• Shpenzimet do të deklarohen në Deklaratën Vjetore të të Ardhurave DIVA për vitin 2025, e cila do të plotësohet në mars 2026.
• Dokumentet që justifikojnë shpenzimet janë: kontratat me institucionet arsimore dhe faturat ose dokumentet e pagesës për kurset e gjuhëve të huaja. Këto dokumente duhet të ruhen, por nuk ngarkohen automatikisht në sistemin DIVA.
• Pas rillogaritjes së tatimit, prindërit me të ardhura nën 1,2 milionë lekë do të përfitojnë kompensim për diferencën e tatimit të mbetur, të cilin mund ta kërkojnë brenda tre muajve pas dërgimit të kërkesës.

Sqarimi i Tatimeve:

“Kërkesa për zbritje nga baza tatimore bëhet nga anëtari i familjes me të ardhura më të larta vjetore të tatueshme. Dokumenti që do të ruhet për deklarim është kontrata me institucionet arsimore dhe dokumentet e pagesës për fëmijët apo kurset e gjuhëve të huaja.”

Ky vendim synon të lehtësojë shpenzimet për edukimin e fëmijëve dhe të rrisë aksesin në arsimin formal dhe kurset shtesë për familjet me të ardhura të kufizuara.