Një bombulë gazit ka shpërthyer ditën e sotme në një banesë në Sauk, duke shkaktuar plagosjen e tre anëtarëve të një familjeje.

Si pasojë e shpërthimit dhe flakëve kanë mbetur të lënduar pronari i banesës, Agim Daxha, 46 vjeç, djali i tij, Bjorgo Daxha, 19 vjeç, dhe gjyshja e tyre, Lutfie Daxha, 70 vjeç.

Të tre të plagosurit janë transportuar në spital dhe janë në kujdesin e mjekëve. Ndër ta, gjendja e gjyshes së familjes shihet si më serioze, ndërsa dy të tjerët paraqesin një gjendje relativisht më të qëndrueshme.

“Më datë 28.04.2024, në Sauk, në banesën e shtetasit A. D., dyshohet se ka plasur bombula e gazit dhe ka rënë zjarr.

Si pasojë janë dëmtuar shtetasit A. D., 46 vjeç, B. D., 19 vjeç, dhe L. D., 70 vjeçe, të cilët ndodhen në spital në kujdesin e mjekëve”,-njofton policia.

Grupi hetimor po ndodhet në vendngjarje dhe është duke punuar për të sqaruar rrethanat e ngjarjes.