Një shpërthim eksplozivi ka ndodhur në orët e para të mëngjesit të sotëm në qytetin e Sarandës.

Ngjarja ka ndodhur në lagjen Nr.4 rreth orës 04:35. Raportohet se shpërthimi ka ndodhur në banesën e shtetasit Lefter Lefteri alias Afez Kulla..
Lënda e eksplozivit ishte vendosur në derën e vilës ku ai banon.

Në objektin ku u vendos eksplozivi jetonte familja prej katër anëtarësh e 54-vjeçarit. Ky i fundit rezulton ndërtues, ndërsa më parë ka qenë punonjës i administratës publike. Muajt e fundit Lefteri është kallëzuar madje dhe shoqëruar në Komisariat lidhur me një objekt në ndërtim e sipër në lagjen nr.1. Nuk dihen ende motivet e ngjarjes.

Nga shpërthimi raportohen vetëm dëme materiale, ndërsa policia po heton për të gjetur autorët dhe arsyen e kësaj ngjarje.

Njoftimi i policisë:

Sarandë/Informacion paraprak

Më datë 05.12.2022 rreth orës 04:45, në lagjen nr.1, Sarandë, në murin rrethues të banesës së shtetasit L. L, ka shpërthyer një sasi e vogël lëndë plasëse. Si pasojë janë shkaktuar dëme të vogla materiale.

Menjëherë në vendngjarje kanë shkuar forcat e Policisë dhe grupi hetimor, për të kryer veprimet për sqarimin e rrethanave të ngjarjes, identifikimin dhe kapjen e autorit.