Dy turiste, rezidente në Angli, janë ndihmuar nga policia pasi kishin humbur rrugën gjatë eksplorimit të Majës së Jezercës. Incidenti ndodhi rreth orës 15:15, kur Salla operative e Komisariatit të Policisë Tropojë mori një njoftim për ndihmë nga turistet.

Menjëherë pas sinjalizimit, shërbimet e Policisë Tropojë, së bashku me Ekipin e Kërkim-Shpëtimit Malor Valbonë, u nisën në drejtim të Majës së Jezercës për të lokalizuar dhe ndihmuar turistet e humbura. Pas rreth tre orë kërkimesh intensive, ato u gjetën në gjendje të mirë shëndetësore.

Turistet u shoqëruan në Valbonë nga punonjësit e policisë dhe më pas u akomoduan në një bujtinë lokale, duke përfunduar me sukses operacionin e shpëtimit pa asnjë problem serioz.