Një ngjarje alarmante është regjistruar sot në Korçë, ku një fëmijë u raportua se kishte pasur bllokim të rrugëve të frymëmarrjes, pasi një objekt i huaj – fillimisht dyshohej një kokërr fasule – kishte kaluar në rrugët e poshtme respiratore.

Gjendja e fëmijës ishte kritike, duke kërkuar ndërhyrje të menjëhershme mjekësore. Për këtë arsye, u bë e mundur transporti i tij urgjent me helikopter nga Korça drejt Tiranës, ku mjekët specialistë realizuan ndërhyrjen për shpëtimin e jetës.

Falë reagimit të shpejtë dhe profesionalizmit të stafit mjekësor, objekti u hoq me sukses, ndërsa gjendja shëndetësore e fëmijës tashmë paraqitet e stabilizuar.

Sipas burimeve nga spitali, fëmija ndodhet jashtë rrezikut për jetën dhe po merr trajtim të mëtejshëm nën kujdesin e mjekëve.