Lëvizja “Shqipëria Bëhet” ka reaguar me vendosmëri ndaj sulmeve të rënda të ndodhura në veri të Republikës së Kosovës gjatë 24 orëve të fundit, duke i cilësuar si një kërcënim serioz për paqen dhe sigurinë në rajon.

Në një deklaratë zyrtare, lëvizja shprehu shqetësimin se ngjarje të tilla i rikthejnë rajonit kujtimet e dhimbshme të një lufte, pasojat e së cilës vazhdojnë të ndihen.

“Mbështesim institucionet e Republikës së Kosovës në përpjekjet e tyre për ruajtjen e rendit dhe sigurisë dhe inkurajojmë angazhimin për zbardhjen e plotë të ngjarjeve,” thuhet në deklaratë.

Lëvizja i bëri thirrje faktorëve ndërkombëtarë që të ndërhyjnë me maturi dhe qartësi, duke parandaluar çdo përshkallëzim të mëtejshëm të situatës.

Kjo deklaratë thekson rëndësinë e ruajtjes së paqes dhe stabilitetit në rajon, duke nënvizuar domosdoshmërinë e përgjegjësisë ndërkombëtare për të kontribuar në zgjidhjen e tensioneve.