TIRANË – Shqipëria do të përkulet përpara figurës së një prej mjeshtrave më të mëdhenj të kinematografisë shqiptare, Dhimitër Anagnostit, i cili u nda nga jeta në moshën 89-vjeçare pas një sëmundjeje të gjatë. Këshilli i Ministrave ka shpallur të martën, më 2 shtator 2025, ditë zie kombëtare në nderim të regjizorit të shquar, duke e cilësuar atë një personalitet të rrallë që i dha vendit një trashëgimi të pasur kulturore dhe artistike.

Homazhet publike dhe ceremonia shtetërore do të zhvillohen në Teatrin Kombëtar të Operës dhe Baletit në Tiranë, nga ora 10:00 deri në 13:00, ku qytetarët, personalitetet e artit, politikës dhe kulturës do të kenë mundësinë të shprehin respektin e fundit. Në orën 10:00, në të gjithë vendin do të mbahet një minutë heshtje në nderim të tij, ndërsa flamujt në institucionet shtetërore dhe publike do të ulen në gjysmështizë.

Lajmi për ndarjen nga jeta të Dhimitër Anagnostit është pritur me pikëllim nga bota e artit dhe kinemasë shqiptare. E bija e tij, Juna Anagnosti, përmes një postimi prekës në rrjetet sociale, njoftoi për organizimin e homazheve, duke ftuar të gjithë ata që e kanë dashur dhe vlerësuar figurën e të atit, të jenë pjesë e këtij momenti përkujtimor.

Ministria e Ekonomisë, Kulturës dhe Inovacionit konfirmoi se ceremonia do të ketë karakter shtetëror, duke e cilësuar Anagnostin “një kolos të ekranit shqiptar, një mjeshtër që frymëzoi breza të tërë artistësh dhe publikun përmes veprave të tij”.

Dhimitër Anagnosti, i martuar me aktoren e mirënjohur Roza Anagnosti, mbetet një nga regjisorët më të rëndësishëm të historisë së kinemasë shqiptare. Filmat e tij kanë shënuar epoka, duke reflektuar realitetin, kulturën dhe shpirtin e shqiptarëve në dekada të ndryshme.

Shqipëria do ta kujtojë Anagnostin jo vetëm për kontributin e tij të jashtëzakonshëm në art, por edhe për trashëgiminë e pasur që u la brezave të ardhshëm.