Kombëtarja shqiptare e futbollit u mposht 0-1 nga Gjeorgjia në stadiumin “Air Albania”, në një sfidë që vlente për raundin e dytë të ndeshjeve në Grupin B1 të Ligës së Kombeve. Një supergol i shënuar nga Kochorashvili në minutën e 71-të vendosi fatin e ndeshjes, me kuqezinjtë tanë që nuk arritën të godasin asnjëherë portën e mbrojtur nga Mamardashvili. Pas fitores me Ukrainën tre ditë më parë, Kombëtarja shqiptare merr një humbje në shtëpi, që është edhe e para në epokën e trajnerit Sylvinho në “Air Albania”. Ndeshjen e tretë në Ligën e Kombeve, kuqezinjtë do ta luajnë më 11 tetor në Pragë, kundër Çekisë.
Përmbledhje e Ndeshjes:
Dueli nisi me shumë kujdes nga lojtarët e të dy skuadrave, aq sa për momente të caktuara ndeshja u bë e mërzitshme. Në 20 minutat e para, tanët ishin në kontroll të situatës, teksa më pas miqtë dolën në lojën e tyre dhe rrezikuan në sulm. Pavarësisht disa ngacmimeve të vogla, pjesa e parë u mbyll pa gola.
Fraksioni i dytë ishte pothuajse identik me 45 minutat e para, ndërsa miqtë rrezikuan në dy raste. Pas këtyre rasteve, duhej një perlë nga Kochorashvili në minutën e 71-të, që Strakosha të shoqëronte topin me sy në rrjetë, pa pasur asnjë mundësi reagimi. As futja në lojë e Uzunit dhe Seferit nuk solli ndonjë shkëndijë për skuadrën shqiptare, ndërsa Strakosha me dy pritje vendimtare e mbajti ekipin në lojë deri në fund. Megjithatë, Kombëtarja nuk arriti të prodhojë asnjë gjuajtje në portë, madje as gjatë katër minutave shtesë.
Situata e Grupit B1:
Pas përfundimit të ndeshjeve të dyta në Grupin B1 të Ligës së Kombeve, kryeson Gjeorgjia me gjashtë pikë të plota, e ndjekur nga Shqipëria me tre pikë, të njëjta me Çekinë. Në fund të renditjes është Ukraina me zero pikë. Në ndeshjen tjetër të grupit, Çekia mposhti Ukrainën me rezultatin 3-2.
Notat e Lojtarëve:
Autori i golit, Kochorashvili, ishte padyshim lojtari më i mirë në fushë, me një notë prej 8.1. Ndërkohë, për Shqipërinë, Ylber Ramadani ishte më i vlerësuari, me një notë prej 7.7, ndërsa Rey Manaj zhgënjeu, duke marrë notën 6.3.
Komentet Kryesore nga Ndeshja:
– 90+4′ Mbyllet ndeshja, Gjeorgjia fiton 0-1 ndaj Shqipërisë në Tiranë.
– 90′ Katër minuta shtesë.
– 90′ Strakosha bën heroin në dy raste.
– 81′ Myrto Uzuni zëvendëson Bajramin.
– 75′ Davitashvili zëvendëson Kvaratskhelian te miqtë.
– 72′ Jasir Asani dhe Rey Manaj largohen, Sebastian Spahiu debuton për Kombëtaren, në fushë edhe Seferi.
– 71′ Kochorashvili ndëshkon Shqipërinë me një supergol, në të parën goditje në portë.
– 67′ Gabim nga tanët, Ismajli shpëton situatën.
– 60′ Arbër Hoxha i lë vendin Qazim Laçit.
– 58′ Sërish Gjeorgjia me një rast të mirë, por topi shkon jashtë.
– 55′ Mitaj gabon dhe i dhuron topin kundërshtarëve; goditja e miqve shumë pranë portës.
– 46′ Nis pjesa e dytë, asnjë zëvendësim për dy skuadrat.
– 45+1′ Mbyllet 0-0 pjesa e parë në “Air Albania”.
– 45′Një minutë shtesë në fund të pjesës së parë.
– 44′ Miqtë kontrollojnë minutat e fundit, tanët dalin nga presioni.
– 39′ Asani dhe Hoxha ‘ngacmojnë’ nga krahët, ende asnjë rast serioz për shënim.
– 21′ Kvaratskelia “fal” Shqipërinë, sfera kalon gjithë pasqyrën e portës. Tanët me fat.
– 3′ Mundësi e mirë për tanët, Manaj nuk përfiton nga brenda zonës. Gjuajtja ndalet nga mbrojtësit.
– 1′Nis ndeshja me topin e parë shkelmuar nga miqtë.
Statistikat kundër Gjeorgjisë:
Në 16 përballje mes Shqipërisë dhe Gjeorgjisë, Shqipëria ka fituar vetëm 3 herë, ndërsa Gjeorgjia ka fituar 9 herë, dhe 4 takime kanë përfunduar në barazim. Bilanci i golave gjithashtu është në favor të kundërshtarëve: në portën kuqezi janë shënuar 24 gola, ndërsa Shqipëria ka realizuar vetëm 13.
Formacionet Zyrtare:
– Shqipëria (4-3-3): Strakosha; Hysaj, Ismajli, Kumbulla, Mitaj; Asllani, Ramadani, Bajrami; Asani, A. Hoxha, Manaj
– Trajner: Sylvinho
– Gjeorgjia (3-5-2): Mamardashvili, Gvelesiani, Kashia, Dvali, Kakabadze, Koçorashvili, Kiteishvili, Lokoshvili, Çakvetadze, Kvaratskhelia, Mikautadze
– Trajner: Willy Sagnol
