Kryeministri Edi Rama mori pjesë përmes videokonferencës në Samitin e Zgjerimit të Euronews, duke marrë pjesë në dialogun BE – Ballkani Perëndimor mbi të ardhmen e zgjerimit.

Rama theksoi optimizmin e Shqipërisë në procesin e integrimit:

“Kur bie fjala për rajonin, bie dakort që ky është një proces i bazuar në meritë. Ka karakteristika dhe vende të ndryshme në rajon. Kur vjen fjala te ne, them se jemi kombi më eurooptimist në Europë.”

Ai përmendi reformën në drejtësi dhe veprimtarinë e SPAK si një shembull unik për rajonin:

“Shqipëria po bën diçka të paparë dhe unike, reformën në drejtësi dhe njohjen nga ana jonë të pavarësisë së drejtësisë. Veprimtaria e plotë e strukturës së posaçme ka krijuar në Shqipëri shembullin se lufta kundër korrupsionit shkon përtej fjalëve dhe sipërfaqes. Ajo që kurrë nuk kishte ndodhur në Shqipëri, po ndodh në vitet e fundit, diçka që asnjë vend nuk pretendon se e ka bërë. Është për të thënë se e kemi marrë shumë seriozisht, ne pranojmë mbështetje dhe partneritet, por jo leksione kur vjen puna te korrupsioni.”

Kreu i qeverisë foli edhe për përdorimin e teknologjisë dhe inteligjencës artificiale në prokurimet publike:

“Diella, produkt i një lufte sistemore përmes modernizimit. Brenda 2027 synojmë të kemi sistemin e plotë bazuar në AI të prokurimeve publike. Jemi i vetmi vend në këtë proces që kemi përdorur AI në korpusin tonë ligjor, duke e bërë procesin më të shpejtë për përkthimin dhe analizimin e përgatitjes së të gjitha paketave ligjore për t’u miratuar në parlament. Po përpiqemi të vrapojmë dhe të hedhim hapa të mëdhenj duke përdorur teknologjinë dhe Inteligjencën Artificiale për të treguar se vendi ynë në Europë është i merituar.”

Fjala e Ramës nënvizon angazhimin e Shqipërisë për transparencë, luftë kundër korrupsionit dhe përdorim të teknologjisë moderne si mjete për të përshpejtuar integrimin evropian.