Ministria e Financave e prezantoi sot Strategjinë e tretë të Menaxhimit të Financave Publike, e cila përcakton rrugëtimin e vendit drejt anëtarësimit në Bashkimin Evropian deri në vitin 2030. Ministri i Financave theksoi se reforma e menaxhimit të financave publike synon të sigurojë një sistem transparent, i përgjegjshëm dhe efikas për përdorimin e burimeve publike për përmirësimin e shërbimeve dhe zhvillimin ekonomik.
“Reforma e Menaxhimit të Financave Publike synon të sigurojë një sistem financiar publik që promovon transparencën, llogaridhënien, disiplinën fiskale dhe efikasitetin në menaxhimin dhe përdorimin e burimeve publike për përmirësimin e ofrimit të shërbimeve dhe zhvillimin ekonomik”, tha Ministri.
Strategjia përmban synime të rëndësishme, si përmirësimi i politikave fiskale, avancimi në planifikimin strategjik dhe buxhetor, rritja e mobilizimit të të ardhurave, si dhe integrimi i elementeve të ekonomisë së gjelbër. Ministri Mete theksoi se Shqipëria po kalon një moment të mirë ekonomik, me shënime të ndjeshme pozitive në treguesit makroekonomikë.
Duke iu referuar Strategjisë së re, Ministri Mete informoi se disa prej synimeve të saj janë:
· Përmirësimi i mëtejshëm i politikave fiskale dhe makroekonomike;
· Avancimi në planifikimin e integruar strategjik dhe buxhetor, si edhe rritja e monitorimit dhe raportimit;
· Rritja e mobilizimit të të ardhurave dhe përmirësimi i mëtejshëm i sistemeve për menaxhimin tatimor e doganor;
· Forcimi i menaxhimit të zbatimit të buxhetit dhe implementimi i mëtejshëm i standardeve ndërkombëtare të kontabilitetit;
· Avancimi i përputhshmërisë së sistemeve për Kontrollin e Brendshëm Financiar Publik në përputhje me praktikat e BE-së;
· Integrimi i elementeve të ekonomisë së gjelbër, duke synuar procedura dhe praktika që nxisin shpenzime drejt aktiviteteve të gjelbra.
Ka vijuar performanca e mirë e të ardhurave edhe në muajt e parë të vitit 2024, përgjatë të cilit projektojmë të arrijmë në mbi 28% të PBB-së sa i përket mbledhjes së të ardhurave. Gjithashtu, vitin e kaluar u shënua niveli më i ulët i detyrimeve të prapambetura prej rreth 1% në raport me shpenzimet, që nga momenti i nisjes së monitorimeve në vitin 2016, kjo edhe në kuadër të reformave të ndërmarra në zbatim të Strategjisë së Menaxhimit të Financave Publike”, tha Ministri.
Strategjia e re për Menaxhimin e Financave Publike është në konsultim publik dhe pritet të miratohet brenda 6-mujorit të parë të këtij viti, për të nisur më tej me fazën e implementimit të saj.
