Ministri për Europën dhe Punët e Jashtme, Igli Hasani, ka bërë të ditur përmes një njoftimi zyrtar se katër shtetas shqiptarë janë evakuuar me sukses nga territori i Izraelit, në një kohë tensioni dhe përshkallëzimi të ndjeshëm të konfliktit në rajon.

“Katër qytetarë të tjerë shqiptarë janë evakuuar me sukses nga Izraeli – dy përmes Jordanisë dhe dy të tjerë përmes Egjiptit – të cilët gjendeshin atje për arsye profesionale dhe familjare,” shkruan Hasani.

Ministri falënderoi autoritetet e përfshira në operacionin e koordinuar të evakuimit:

“Falënderojmë autoritetet izraelite, jordaneze, egjiptiane dhe Ambasadën Austriake në Tel Aviv për bashkëpunimin e ngushtë me ambasadat shqiptare në Tel Aviv dhe Kajro.”

Ai theksoi gjithashtu se MEPJ mbetet e angazhuar në monitorimin dhe ndihmën për çdo rast:

“Vijojmë të ndjekim me përparësi çdo rast të qytetarëve shqiptarë të prekur, të cilët kërkojnë asistencë nga institucionet tona.”

Ky është evakuimi i radhës i qytetarëve shqiptarë nga një zonë konflikti, në një moment ku situata në Lindjen e Mesme vijon të përshkallëzohet ndjeshëm. Ministria është në gatishmëri të lartë për të ndërhyrë në çdo rast ku nevojitet mbështetje konsullore dhe logjistike për shtetasit shqiptarë jashtë vendit.