Policia italiane ka arrestuar një 45-vjeçar shqiptar pas kontrollit të mjetit me të cilin udhëtonte, ku u gjet lëndë narkotike me vlerë 1 milion euro.

Arrestimi ndodhi mbrëmjen e djeshme në autostradën A22 në zonën e Bolzanos, rreth orës 18:45. Policia ndërhyri pasi shqiptari kishte ndalur mjetin dhe po krijonte probleme në qarkullim. Ky veprim tërhoqi vëmendjen e policëve, të cilët vendosën të kryejnë një kontroll.

Gjatë kontrollit, rezultoi se shqiptari, banues në Lombardi, kishte precedentë të shumtë penalë, përfshirë tregtimin e drogës. Kontrollet e mëtejshme zbuluan një çantë të zezë prej pëlhure të fshehur mes mjeteve të punës dhe sendeve shtëpiake në pjesën e pasme të furgonit. Brenda saj, u gjetën 10 pako me marijuanë me peshë totale prej 5.5 kg.

Sasia e drogës e sekuestruar mund të ndahej në të paktën 45,000 doza, me një vlerë të përllogaritur prej gati 1 milion euro në tregun e paligjshëm.