Seanca për rivlerësimin e masës së sigurisë për kryebashkiakun e Tiranës, Erion Veliaj, e cila ishte planifikuar për sot, është shtyrë për nesër në orën 12:00. Arsyeja e shtyrjes është paraqitja e provave të reja nga SPAK, ndaj të cilave avokatët e Veliajt kërkuan kohë për t’u njohur.

Veliaj, i cili është arrestuar një muaj më parë me urdhër të SPAK dhe vendim gjykate, ndodhet aktualisht në paraburgim në Durrës, nën akuzat e korrupsionit dhe pastrimit të parave. Në seancën e sotme, Gjykata ka refuzuar pranimin e avokatit amerikan që kishte kërkuar të merrte pjesë si vëzhgues.

Gjatë seancës, Erion Veliaj dhe biznesmeni Elman Abule, të dy të arrestuar dhe nën masën e sigurisë “Arrest me burg”, kanë ofruar garanci pasurore dhe kanë kërkuar bllokimin e pasaportave si mundësi për të arritur lirinë.

Vendimi i Gjykatës së Apelit do të jepet nga gjyqtari Engert Pëllumbi.