Presioni mbi IOC po rritet për të ndaluar Rusinë dhe Bjellorusinë nga Lojërat Olimpike të 2024-ës për shkak të pushtimit të Ukrainës.

IOC nuk ka marrë një vendim për këtë çështje dhe perspektiva e sportistëve nga të dy vendet që marrin pjesë si të pavarur është në konsultim. Megjithatë, sot, në një telekonferencë të thirrur nga Ministrja e Sporteve të Lituanisë, Juorgita Siugzdiniene, 35 vende vendosën të kërkojnë që IOC të mos pranojë Rusinë dhe Bjellorusinë në Paris 2024.

Midis tyre janë SHBA, Britania e Madhe, Gjermania, Franca, Japonia. Për përjashtimin dolën pak ditë më parë komitetet olimpike të Finlandës, Islandës, Norvegjisë, Suedisë dhe Danimarkës, ndërsa javën e kaluar të njëjtën gjë bënë edhe Letonia, Lituania, Estonia dhe Polonia.

Në telekonferencë ndërhyri presidenti i Ukrainës, Volodymyr Zelensky, i cili nënvizoi, sipas një përfaqësuesi të Ministrisë së Sporteve të Lituanisë, se parimet e neutralitetit nuk mund të zbatohen në rastin e pushtimit rus të Ukrainës.
Ukraina ka kërcënuar me bojkot nëse IOC lejon edhe atletët nga Rusia dhe Bjellorusia të marrin pjesë si të pavarur, por pikëpamjet midis vendeve nuk përkojnë.

Francezët, të cilët janë edhe organizatorë, nuk mund t’i bojkotojnë Lojërat, ndërkohë që vështirë se do ta bëjnë këtë as SHBA. Greqia e ka bërë të qartë se është kundër bojkoteve, siç ka qenë që nga viti 1896 e deri më sot.