Trajneri i Kombëtares Shqiptare, Silvinjo, ka shprehur emocionet e tij pas barazimit dramatik 2-2 ndaj Kroacisë. Sipas teknikut kuqezi, kjo ndeshje do të mbetet në kujtesën e tij dhe të gjithë shqiptarëve për një kohë të gjatë.

Silvinjo vlerësoi performancën e ekipit, duke e krahasuar me ndeshjen e mirë kundër Italisë, dhe theksoi se diferencën e bëri rezultati. Ai u shpreh i impresionuar nga minutat e fundit të ndeshjes, të cilat i përshkroi si të paharrueshme.

“Me gjithë respektin për Kroacinë, që kanë bërë shumë mirë në 7-8 vitet e fundit, dua t’i komplimentoj. 5 minutëshi i fundit do të mbetet në memorien e të gjithë shqiptarëve. Mund të kishim mbyllur ndeshjen me golin e dytë, por e pësuam dy herë. Megjithatë, ato minuta të fundit do të mbeten mend gjatë,” deklaroi Silvinjo.

Trajneri theksoi rëndësinë e kësaj ndeshjeje për eksperiencën e lojtarëve të rinj dhe për të ardhmen e ekipit. “Në dhomat e zhveshjes, kemi lojtarë që po fitojnë eksperiencë për të ardhmen. Nëse do ishte shënuar ai gol i Manajt ndaj Italisë, do flisnim ndryshe. Ishin të dyja ndeshje të mira, por diferencën e bën rezultati,” shtoi ai.

Silvinjo gjithashtu shpjegoi arsyen pse zgjodhi Dakun para Brojës në minutat e fundit të ndeshjes. “Zgjodhëm Dakun para Brojës, sepse në 10 minutat e fundit, Kroacia ishte e tërhequr. Broja kërkon hapësira. Daku është lojtar që tërheq ekipin,” përfundoi ai.

Kjo ndeshje, me gjithë dramatikën dhe emocionet e saj, do të shërbejë si një mësim i vlefshëm dhe një moment i rëndësishëm për zhvillimin e mëtejshëm të Kombëtares Shqiptare.