David Beckham, një nga figurat më emblematike të futbollit britanik dhe një ikonë ndërkombëtare, është nderuar zyrtarisht me titullin “Sir” nga Mbreti Charles III, si pjesë e listës së Nderimeve për Ditëlindjen e Mbretit.

Në moshën 50-vjeçare, ish-kapiteni i Anglisë dhe ylli i Manchester United, Real Madrid dhe LA Galaxy, u vlerësua për kontributin e jashtëzakonshëm në sport dhe bamirësi, duke u bashkuar me një grup elitar sportistësh që kanë marrë këtë nderim historik.

“Ka qenë privilegji më i madh i karrierës sime të luaj dhe të jem kapiten i vendit tim – ishte një ëndërr fëmijërie që u bë realitet,” – u shpreh Beckham pas marrjes së titullit. “Jashtë fushës, kam pasur fatin të përfaqësoj Britaninë nëpër botë dhe të punoj me organizata që ndihmojnë komunitetet në nevojë dhe frymëzojnë brezat e rinj.”

Beckham është kujtuar për stilin e tij të veçantë në fushë, vizionin e lojës dhe për momentet historike që kanë mbetur në memorien e futbollit anglez – veçanërisht goli legjendar ndaj Greqisë më 6 tetor 2001, që kualifikoi Anglinë për Kupën e Botës 2002. Ishte pikërisht pas atij momenti që komentatori britanik tha:
“Jepini këtij njeriu një titull kalorësie!” – një thirrje që sot është bërë realitet.

Përveç karrierës së tij brilante sportive, Beckham ka shërbyer si ambasador global i UNICEF-it dhe ka mbështetur dhjetëra nisma bamirësie, duke përdorur famën e tij për të promovuar kauza sociale dhe humanitare.

Me këtë titull, Sir David Beckham forcon trashëgiminë e tij jo vetëm si një sportist i klasit botëror, por si një figurë frymëzuese që ka shënuar epokë brenda dhe jashtë fushave të blerta.