Kisha Katolike e Greqisë është përfshirë në një skandal të madh financiar, teksa autoritetet greke kanë nisur një hetim mbi dy priftërinj të lartë të hierarkisë së Kishës, të cilët dyshohet se kanë përvetësuar një shumë prej 3 milionë euro. Këto fonde janë investuar në disa lokale nate, duke nxitur një përgjigje të ashpër nga autoritetet.

Pas këtyre zbulimeve, Presidenti i Autoritetit Kundër Pastrimit të Parave ka urdhëruar ngrirjen e llogarive bankare dhe pasurive të pesë pronarëve të klubeve të natës, duke përcjellë gjetjet e tij në organet përkatëse të drejtësisë. Sipas mediave greke, hetimi daton që tetë vite më parë, kur filluan të dilnin shuma të mëdha parash nga llogaritë e Kishës Katolike drejt llogarive të pronarëve të disa klubeve të natës, të cilat paraqiteshin si “investime” në këto biznese.

Lëvizja e parave të konsiderueshme alarmoi fillimisht institucionet financiare dhe përfundoi në vëmendjen e institucioneve ligjzbatuese të Greqisë, të cilat nisën hetimet. Autoriteti Kundër Pastrimit të Parave konfirmoi se shuma prej 3 milionë eurosh ishte përvetësuar nga fondet e Kishës, duke e çuar hetimin tek dy priftërinjtë dhe biznesmenët e përfshirë.