Gießen, Gjermani – Maj 2025
Një ngjarje tronditëse ka përfshirë gjimnazin “Liebig” në qytetin gjerman të Gießen, në landin e Hessenit, ku një votim anonim për zgjedhjen e motos së maturës ka prodhuar slogane me referenca të drejtpërdrejta naziste dhe terroriste, duke shkaktuar valë reagimesh të ashpra në opinionin publik dhe mediat gjermane.
Sloganet e propozuara për moton e maturës 2026 përfshinin fraza si:
• “Abi macht frei” – një deformim i makabër i shprehjes naziste “Arbeit macht frei” (“Puna të bën të lirë”), që qëndronte mbi hyrjet e kampeve të përqendrimit si Auschwitz;
• “Abi Akbar – eksploziv përmes maturës” – një lojë fjalësh që ironizon frazën fetare “Allahu Akbar” në kontekstin e sulmeve terroriste islamike;
• “NSDABI – digjni Duden-in” – një përzierje e akronimit të partisë naziste (NSDAP) dhe një thirrje për djegien e fjalorit gjerman “Duden”, që rikujton djegien e librave gjatë regjimit nazist.
Ngjarja është denoncuar publikisht nga vetë përfaqësuesit e nxënësve, ndër ta Nicole Kracke, e cila shprehu shqetësimin se tashmë maturantët janë “damkosur me vulën naziste”.
“Kjo të dhemb. Ne nuk jemi nazistë, por sot kështu jemi perceptuar. Motoja e maturës u kthye në një turp publik,” – tha ajo për revistën gjermane Der Spiegel.
Drejtoria e shkollës është vënë menjëherë në lëvizje për të hetuar rastin dhe për të adresuar pasojat morale dhe edukative që ka shkaktuar ky incident, ndërsa autoritetet arsimore të landit kanë kërkuar një verifikim të menjëhershëm të procedurave të zgjedhjes së motove shkollore në të gjitha institucionet e mesme.
