Revista portugeze “TV Guia” është përballur me një stuhi kritikash pas publikimit të kopertinës së saj të fundit, ku rikthehet në vëmendje humbja tragjike e futbollistit Diogo Jota dhe vëllait të tij, André Silva, të cilët humbën jetën më 3 korrik në një aksident automobilistik.

Në vend që të përqendrohej tek homazhet dhe respekti për familjen, revista zgjodhi një titull sensacional:
“Ruben Neves dhe Rute. Të bashkuar pas vdekjes”, duke shoqëruar tekstin me një foto të mesfushorit portugez dhe vejushës së Jotës, Rute Cardoso, të përqafuar. Imazhi i shkëputur nga konteksti u cilësua një manipulim i rëndë dhe “mungesë respekti për të vdekurit dhe të gjallët”.

Në rrjetet sociale reagimet shpërthyen:
“Një turp i paparë! Në vend të tyre, do ta padisja këtë revistë. Zero respekt për njerëzit,” shkroi një përdorues, komenti i të cilit u shpërnda mbi një milion herë.

Reagimi i qetë i Ruben Neves

Mesfushori i Al-Hilal reagoi publikisht, duke hedhur poshtë çdo insinuatë dhe duke mbrojtur familjen e tij:
“Unë dhe gruaja ime, Débora Lourence, jemi bashkë prej 11 vitesh, të lumtur dhe krenarë për familjen tonë. Kemi ndihmuar Ruten dhe familjen e saj me gjithë zemër. Përdorimi i kësaj fotoje është i turpshëm dhe i pafat.”

Në mbrojtje të tij dolën edhe figura publike. Katia Aveiro, motra e Cristiano Ronaldos, e quajti publikimin “çnjerëzor dhe të neveritshëm”:
“Askush me zemër nuk do të bënte një gjë të tillë. Më vjen turp ta shoh. Fatura do të vijë, qoftë hyjnore apo njerëzore.”

Debat i gjerë në Portugali

Ngjarja ka ndezur një debat të fortë mbi kufijtë e medias sensacionale në Portugali, si dhe mungesën e respektit për privatësinë dhe dhimbjen njerëzore. Deri tani, TV Guia nuk ka reaguar zyrtarisht ndaj kritikave që sa vijnë e shtohen.