Një nga aferat më të mëdha të grabitjes së pronës publike në Tiranë po trondit opinionin publik. Bëhet fjalë për një sipërfaqe trualli prej 1.185 m², pronë shtetërore, e cila, përmes vendimeve të dyshimta gjyqësore dhe skemave të organizuara, ka përfunduar në duar të familjes Xhaferri, duke i hapur rrugë ndërtimit të një prej kullave më luksoze të kryeqytetit, të njohur si “Eyes of Tirana”.
Në qendër të këtij skandali, që përfshin korrupsionin, manipulimin gjyqësor dhe aferat e ndërtimit, qëndron një proces i dyshimtë legalizimi të pronësisë, ku protagonistë janë familja Xhaferri, ndërtuesi Armand Lilo dhe individë të lidhur me figura të njohura të politikës, si Fatmir Xhafaj.
Si nisi grabitja e pronës publike?
Në vitin 2015, një vendim skandaloz i Gjykatës së Apelit të Tiranës, me trupën gjykuese të përbërë nga Fatmira Hajdari (kryetare), Gramoz Levanaj dhe Egmond Gogu, ia kaloi të drejtën e pronësisë mbi truallin “Tarikatit Islamik Halvetian”. Ky vendim është i kundërshtueshëm, pasi bie ndesh me të gjitha provat historike dhe ligjore, duke injoruar faktin se prona ishte në zotërim të Komunitetit Mysliman Shqiptar (KMSH) që prej vitit 1918.
Dokumentacioni arkivor provon se prona, e njohur si “Vorrezat e Adem Idrizit”, ka qenë gjithmonë nën administrimin e KMSH-së dhe se Tarikati Halvetian ka qenë pjesë përbërëse e këtij komuniteti, pa pasur ndonjëherë pronësi të pavarur. Ligjet dhe statutet e kohës, si ai i vitit 1929, e përcaktonin qartë se të gjitha vakëfet myslimane ishin pasuri e Komunitetit Mysliman dhe administroheshin vetëm prej tij.
Kontrata dyshuese dhe kalimi i pronës
Pas këtij vendimi, familja Xhaferri, përmes Liljana Xhaferrit dhe Mirlinda Xhaferri Heirdon, ndërhyri në mënyrë financiare dhe juridike për të mbështetur Tarikatin Halvetian dhe për të marrë kontrollin mbi truallin. Sipas të dhënave, ato realizuan një kontratë shkëmbimi të dyshimtë me Sheh Ali Pazarin, kreun e Tarikatit Halvetian, ku në këmbim të një sipërfaqeje të vogël bodrumesh, siguruan truallin me vlerë miliona euro në qendër të Tiranës.
Ky transferim i pronës ngre dyshime të forta për mashtrime, shantazh dhe abuzime ligjore. Për më tepër, Gjykata e Apelit Tiranë ka injoruar një sërë aktesh dhe vendimesh të tjera që konfirmonin pronësinë shtetërore ose të KMSH-së mbi këtë truall, përfshirë:
• Vendimi i Këshillit të Ministrave nr.891, datë 19.12.2007, që përcaktonte kalimin e truallit në fondin e kompensimit fizik për KMSH.
• VKM nr.1036, datë 14.10.2009, që shfuqizonte vendimin e mëparshëm dhe kthente truallin në pronësi shtetërore.
• Vendimi i Gjykatës së Rrethit Tiranë nr.9744, datë 09.10.2014, që njeh KMSH si pronar legjitim të truallit.
Kjo aferë e madhe pasuron një histori të gjatë të korrupsionit dhe manipulimeve të sistemit gjyqësor, që tani ka nxjerrë në dritë një nga skandalet më të mëdha të grabitjes së pasurisë publike në Shqipëri.
