Disa punonjës policie kanë zhvilluar komunikime joetike në Whatsapp në lidhje me 18-vjeçaren që ka humbur që prej disa ditësh. Në mesazhe lexohet që Shefi i Komisariatit nr.1 Rustem Dervishi raporton në lidhje me ngjarjen dhe një punonjëse tjetër e quajtur Ina Nuka, efektivja që mori medalje nderi nga qeveria pasi i ndodhi një incident para disa kohësh në protestat e opozitës, e pyet çfarë vit prodhimi është ku nënkupton moshën e saj. Shefi ia kthen duke i thënë që është modeli i fundit. Kujtojmë se kemi të bëjmë me një 18-vjeçare.

Pas kësaj ka reaguar Policia e Shtetit ku njofton se Shefi i Komisariatit nr.1 Rustem Dervishi është pezulluar për një periudhë 30-ditore.

Priten informacione të metejshme.

Policia e Shtetit: Në lidhje me një postim në rrjetet sociale, në të cilin pasqyrohet komunikimi joetik në një grup komunikimi në platformën WhatsApp, midis disa punonjësve të Policisë të Komisariatit të Policisë Nr. 1, Tiranë, ju bëjmë me dije se:

Menjëherë pas marrjes dijeni, Drejtoria e Standardeve Profesionale në Drejtorinë e Përgjithshme të Policisë së Shtetit ka pezulluar nga detyra, për një periudhë 30-ditore, Shefin për Krimet në Komisariatin e Policisë Nr. 1, në DVP Tiranë, Komisar R. D., për shkelje të rëndë disiplinore, të parashikuar nga neni 204 i rregullores së Policisë së Shtetit.

Gjithashtu, Drejtoria e Standardeve Profesionale në Policinë e Shtetit, nën drejtimin e AMP-së, vijon punën për kryerjen e një hetimi të plotë administrativ për këtë rast.

Policia e Shtetit është e vendosur për të ndëshkuar cilindo punonjës policie që cenon imazhin e Policisë dhe besimin e qytetarëve te Policia e Shtetit.