Prokuroria e Posaçme (SPAK) ka dhënë pretencën për Sokol Idrizaj dhe anëtarët e një grupi kriminal të akuzuar për kontrabandë mallrash, mosdeklarim të ardhurash, pastrim parash dhe ushtrim pa licencë të aktiviteteve financiare. SPAK ka kërkuar 12 vite burg për Sokol Idrizajn dhe bashkëshorten e tij Elda Idrizaj, 10 vite për djalin e tyre Egi Idrizaj dhe 6 vite për vajzën Bora Idrizaj. Për shkak të gjykimit të shkurtuar, të akuzuarit do të përfitonin zbritje me 1/3 të dënimit, nëse pretenca miratohet nga Gjykata e Posaçme Kundër Korrupsionit dhe Krimit të Organizuar (GJKKO).

Në maj të vitit të kaluar, familja Idrizaj dhe disa bashkëpunëtorë u vunë nën akuzë si pjesë e një grupi që transportonte sende të vjedhura nga Franca në Shqipëri, ku shiteshin në mënyrë të fshehtë përmes argjendarisë së Vangjush Kasharrës në Tiranë. Verifikimet zbuluan se, përmes transaksioneve bankare dhe transportit të paligjshëm të parave, ky grup ka kaluar shuma të mëdha drejt Francës, përfshirë 724,386 euro në banka dhe rreth 2.1 milionë euro në cash.