Prokuroria e Përgjithshme e Specializuar kishte nisur hetimet për ish-kryebashkiakun e Durrësit, Vangjush Dako, dhe disa të pandehur të tjerë. Sot, SPAK ka mbyllur hetimet dhe dosja është dërguar pranë Gjykatës së Krimeve të Rënda me kërkesën për kalimin e saj për gjykim.

Vangjush Dako akuzohet për shpërdorim detyre në dy raste. Një nga akuzat lidhet me dhënien e lejes për ndërtimin e një pallati në Durrës në kundërshtim me ligjin, ndërsa çështja tjetër lidhet me tenderin për projektin e zhvillimit të vijës bregdetare, ku vlera e tij u rrit 10-fish.

Në total, 11 persona janë të pandehur në këtë dosje, ndërsa për njërin prej tyre, Meri Semini, është kërkuar pushimi i çështjes nga prokuroria.

Vangjush Dako u arrestua më 6 qershor me dyshime për shpërdorim detyre. Bashkë me të, u lëshuan 10 urdhër arreste, 7 prej tyre me dërgim në burg dhe 3 në arrest shtëpie. Gjykata ka vendosur ndryshime në masat e sigurisë për disa prej të pandehurve, duke iu bërë zbutje nga burgu në arrest shtëpie. Hetimet dhe gjykimet do të tregojnë rrjedhën dhe rezultatin e kësaj ngjarjeje ligjore.