Policia e Tiranës ka kaluar në SPAK çështjen e zbuluar më 29 tetor, ku në një furgon të parkuar në rrugën “Myslym Shyri” u sekuestruan 23 armë dhe municion.

Hetuesit dyshojnë se arsenali mund t’i përkiste grupit kriminal të Aurel Hoxhës, i shpallur në kërkim për organizimin e vrasjes së Klevis Lleshit në vitin 2020, ngjarje që u zbardh pjesërisht nga komunikimet e zbërthyera në SKY ECC.

Furgoni, në emrin e të arrestuarit Eugert Sino, ishte kamufluar me mbishkrimin “Mirëmbajtja Rrugore”. Sino deklaroi se e kishte marrë automjetin nga një person me emrin Bledar, mbiemrin e të cilit nuk e dinte. 34-vjeçari ka punuar më parë në lokalin “Monopol”, në pronësi të Aurel Hoxhës.

Mes armëve të gjetura janë: 5 snajperë, 1 silenciator, 12 pistoleta, 17 krehra me municion luftarak, celularë dhe pajisje për shpërthime në distancë.

Hetimi i SPAK-ut do të përcaktojë lidhjen e armëve me grupin kriminal dhe rolin e të përfshirëve në këtë rast.