SPAK ka marrë në akuzë ish-kryetarin e Bashkisë së Shkodrës, Bardh Spahia, për shkarkimin e një drejtori në Bashki, duke ngritur polemika mbi prioritetet e drejtësisë në vend.

Në Shkodër, ky hetim shihet si një veprim i diskutueshëm, ndërsa kritikat kanë qenë të ashpra për mënyrën sesi po përdoret drejtësia për të ndjekur raste të tilla, ndërkohë që çështje të mëdha të korrupsionit vazhdojnë të mbeten pezull.

Në mënyrë ironike, qytetarët kanë komentuar se hetimet për Bardh Spahinë janë bërë më të thelluara se ato për aferat e mëdha korruptive. Në një reagim që po qarkullon gjerësisht, thuhet me sarkazëm se ish-kryebashkiaku ka “fshehur inceneratorin e Tiranës”, ka “organizuar demonstratën e 21 janarit” dhe madje ka “porositur Tojota Yaris”.

Duke ironizuar hetimin, thuhet gjithashtu se hetuesit e SPAK po përpiqen të deshifrojnë një mesazh të koduar me dy fjalë, “Nadja e mirë”, duke kërkuar ndihmën e partnerëve ndërkombëtarë për zbardhjen e tij.

Kjo dosje, cilësuar me sarkazëm si “Monalisa e drejtësisë shqiptare”, ka ngritur pikëpyetje mbi seriozitetin e hetimeve dhe nëse drejtësia po zbatohet me standarde të dyfishta.

Ndërkohë, mbetet për t’u parë nëse SPAK do të japë një sqarim mbi këtë çështje dhe nëse ky hetim është vërtet prioritet në luftën kundër korrupsionit dhe krimit të organizuar.