Tiranë – Prokuroria e Posaçme Kundër Korrupsionit dhe Krimit të Organizuar (SPAK) ka ngritur akuzë për “Sigurimin e kushteve për të kryer vrasje” në formën e grupit të strukturuar kriminal ndaj ish-deputetit të Partisë Socialiste, Arben Ndoka, dhe një grupi të afërmish dhe bashkëpunëtorësh të tij.

Burime nga SPAK bëjnë të ditur se akuzat lidhen me përpjekjet e shumta për të vrarë Durim Bamin, pas vrasjes së vëllait të ish-deputetit. Sipas hetimeve, Arben Ndoka ka tentuar të identifikojë autorët e vrasjes dhe ka porositur dhe ndihmuar të kryejnë krimin e hakmarrjes.

Në listën e të akuzuarve përfshihen: dhëndri i ish-deputetit, Arian Tuku, nipi i tij Samuel Ndoka, si dhe Ervis Martinaj, Astrit Avdyli, Aldo Avdyli, Jozi Kraja, Elvis Ndreca, Naim Stafuka, Emiljano Shullazi, Blerim Abazi, Gjin Ndoj dhe Marklen Haka.

SPAK ka vendosur masën e sigurimit “arrest me burg” për personat e përfshirë në këtë çështje, duke theksuar rrezikshmërinë e grupit dhe përpjekjet konkrete për të realizuar një vrasje të planifikuar.

“Hetimet tregojnë se individët e përfshirë kanë siguruar kushtet dhe organizimin për të kryer vrasjen e Durim Bamit, në një akt hakmarrjeje pas vrasjes së vëllait të ish-deputetit,” shprehen burimet nga organi i akuzës.

Hetimet e SPAK vijojnë për dokumentimin e plotë të përgjegjësive penale dhe rolet e secilit individ në grupin e strukturuar kriminal.