TEPELENË – Struktura e Posaçme Kundër Korrupsionit dhe Krimit të Organizuar (SPAK) ka nisur hetime të thelluara në Bashkinë e Tepelenës, duke kontrolluar një sërë dosjesh të lidhura me procedura tenderimi dhe kontrata publike, pas dyshimeve për abuzime me fondet shtetërore.

Zyrtarët e SPAK zbarkuan në ambientet e bashkisë ditën e djeshme, ku janë duke verifikuar dokumentacionin e një sërë tenderash që dyshohet se janë dhënë me favorizime të operatorëve ekonomikë, në kundërshtim me ligjin.

Burime nga organi i akuzës bëjnë me dije se hetimet janë nxitur pas një denoncimi të bërë publik nga një emision investigativ, i cili solli në vëmendje kontrata, fatura dhe dokumente zyrtare që hedhin hije dyshimi mbi procedurat e ndjekura nga kryebashkiaku Tërmet Peçi në disa nga tenderat e shpallur vitet e fundit.

Dosjet e verifikuara lidhen me punë publike, shërbime dhe furnizime, ku dyshohet për manipulim të garës, fryrje të kostove dhe mungesë transparence në vlerësimin e ofertave.

Aktualisht, hetimet janë në fazë të parë dhe pritet që SPAK të dalë me një deklaratë zyrtare mbi gjetjet preliminare. Nga ana e tij, kryebashkiaku Peçi nuk ka reaguar ende publikisht për këto zhvillime, ndërsa burime pranë bashkisë pretendojnë se çdo procedurë ka qenë e rregullt.

Ky është rasti i radhës kur një bashki lokale vihet në shënjestër të SPAK, në kuadër të luftës kundër korrupsionit dhe keqpërdorimit të fondeve publike në nivel vendor.