Spanja po përballet këtë të hënë me 20 vatra të mëdha zjarresh në të gjithë vendin, nga të cilat 12 janë jashtë kontrollit rreth qytetit Ourense në Galici.

Që nga fillimi i vitit, zjarret kanë djegur 158,000 hektarë, ndërsa katër zjarrfikës kanë humbur jetën, përfshirë një prej tyre gjatë luftës me flakët ditën e diel.

Për të përballuar situatën, kryeministri spanjoll Pedro Sanchez ka dërguar 500 ushtarë shtesë në terren, duke e çuar numrin total në 1,900. Një pjesë e rrugës së famshme të pelegrinazhit Camino de Santiago u mbyll për shkak të rrezikut, ndërsa zjarri po përhapet në shpatet jugore të vargmalit Picos de Europa.

Madridi ka kërkuar ndihmë ndërkombëtare nga Mekanizmi Europian për mbrojtjen civile, dhe Francë e Itali janë tashmë duke asistuar autoritetet spanjolle, ndërsa pritet ndihmë edhe nga Holanda.

Në Portugali, situata është po aq e rëndë: një zjarrfikës humbi jetën në një aksident, ndërsa dy të tjerë u plagosën. Sipas EFFIS, rreth 216,000 hektarë tokë janë djegur në vend këtë vit.

Kjo verë ka qenë e vështirë për Europën, me zjarre të mëdha që kanë shkatërruar pyjet dhe lënë dhjetëra viktima, nga Franca dhe Portugalia, te Spanja, Ballkani dhe Turqia. Temperaturat ekstreme dhe moti i thatë kanë përkeqësuar situatën, ndërsa autoritetet po punojnë pa pushim për të shpëtuar banorët dhe për të minimizuar dëmet.