Policia e Spanjës ka sekuestruar një ngarkesë prej 7 tonësh kokainë, duke e quajtur këtë sasinë më të madhe të këtij lloji të kontrabanduar në vend. Aksioni u zhvillua në orët e para të 27 dhjetorit, kur policia zbuloi dy varka të dyshimta me shpejtësi të lartë pranë lumit Guadalquivir, të njohura si “narko-lança”.

Duke përdorur mbikëqyrje ajrore, detare dhe tokësore, autoritetet ndjekën varkat dhe i panë duke shkarkuar sasi të mëdha ngarkesash. Pas ngarkimit, pakot e drogës u transportuan në një pronë rurale të ruajtur në provincën e Seviljes. Gjatë një bastisjeje të mëvonshme, policia zbuloi dy kontejnerë të magazinimit nëntokësor të krijuar për të fshehur ngarkesat.

Përveç kokainës, oficerët sekuestruan tre armë zjarri, përfshirë një pushkë sulmi AK-47, dhe dy automjete të vjedhura. Tre persona u arrestuan, ndërsa hetimet për operacionin janë ende aktive.

Ky aksion vjen pas një konfiskimi tjetër historik, ku në nëntor autoritetet spanjolle njoftuan se kishin sekuestruar një ngarkesë rekord prej 13 tonësh kokainë, të kontrabanduar nga Ekuadori nëpërmjet një ngarkese bananesh. Spanja ka pasur një numër rekord konfiskimesh të kokainës vitet e fundit, duke u identifikuar si pika kryesore e hyrjes së kësaj lënde narkotike në Evropë.