Autoritetet spanjolle kanë arrestuar katër shtetas shqiptarë, të cilët akuzohen për trafik droge dhe mashtrim me energjinë elektrike, pas zbulimit të një plantacioni të brendshëm marijuane në një godinë industriale në bashkinë Hostalric, në rajonin e Selvës.

Operacioni u zhvillua nga Garda Civile në bashkëpunim me Policinë Vendore, pas marrjes së indikacioneve për ekzistencën e një organizate kriminale të përfshirë në kultivimin dhe shpërndarjen e drogës.

Me urdhër të posaçëm kontrolli, forcat policore bastisën objektin dhe sekuestruan rreth 80.4 kg sytha marijuane, si dhe një sasi të konsiderueshme pajisjesh elektrike të sofistikuara për kultivimin në ambiente të mbyllura.

Hetimet janë ende në vijim dhe autoritetet nuk përjashtojnë arrestime të tjera në lidhje me këtë rast.