Spitali Shefqet Ndroqi i është rikthyer normalitetit dhe nga nesër nuk do të jetë më në funksion të pacientëve me COVID-19.

Lajmin e mirë e ka bërë me dije sot ministrja e Shëndetësisë Ogerta Manastirliu.

“Shefqet Ndroqi” do t’i rikthehet sërish funksionit si një Qendër Rajonale Spitalore, ku trajtohen pacientët me sëmundje të mushkërive, si edhe ata që kërkojnë trajtim për sëmundjet e brendshme, ato të zemrës dhe për ndërhyrje të kirurgjisë së përgjithshme.

Ministrja e Shëndetësisë, Ogerta Manastirliu ka deklaruar se 17 pacientët me COVID-19 do të dërgohen tashmë tek spitali Infektiv, i vetmi spital i posaçëm momentalisht për pandeminë.

Pavionet e COVID në ”Shefqet Ndroqit” do të dezinfektohen teksa 30 të shtruar me sëmundje mushkërie do të transferohen tek Sanatoriumi.