Vetëm pak ditë përpara nisjes së Botërorit të Klubeve, sulmuesi uruguaian Luis Suárez ka dhënë një mesazh të qartë për rivalët e Inter Miamit, mes tyre edhe gjigantin evropian FC Porto.

Në një deklaratë për mediat, Suárez theksoi ambicien e skuadrës së drejtuar nga Tata Martino për të kaluar me sukses fazën e grupeve në debutimin e tyre në këtë turne prestigjioz.

“Ndeshemi me një grup shumë të vështirë dhe konkurrues, por do të përpiqemi të japim maksimumin për të kaluar më tej. Do të bëjmë më të mirën tonë dhe pastaj do të shohim se kë do të kemi përballë,” – u shpreh ai me vendosmëri.

Inter Miami, që përfaqëson MLS-në në këtë edicion, është pjesë e Grupit A, së bashku me Porton, kampionët afrikanë të Al Ahly dhe brazilianët e Palmeiras. Takimi i parë do të zhvillohet më 15 qershor ndaj Al Ahly, ndërsa përballja me Porton është parashikuar më 19 qershor, ora 21:00 (me orën shqiptare).

Përtej angazhimeve me Inter Miamin, Suárez ndaloi edhe te një talent i madh i futbollit europian – adoleshenti i Barcelonës, Lamine Yamal, për të cilin pati fjalë të mëdha:

“Është vetëm 17 vjeç, por po tregon një maturi të jashtëzakonshme. Është shumë bukur ta shohësh të rritet si lojtar. Si tifoz i Barcelonës, jam shumë i lumtur për progresin e tij. Duhet të vazhdojë të kënaqet me futbollin dhe të përmirësohet çdo ditë.”

Pjesëmarrja e Inter Miamit në Botërorin e Klubeve është historike, dhe Suárez – një nga emrat më të mëdhenj në skuadër – shihet si lideri kyç që mund të udhëheqë skuadrën drejt rezultateve të mëdha. Së bashku me Lionel Messin dhe Busquetsin, ai pritet të jetë thelbësor në këtë aventurë ndërkombëtare.