Pasagjerët në disa nga aeroportet më të mëdha të Evropës po përballen sërish me kaos dhe vonesa, pas sulmit kibernetik që goditi sistemet e check-in dhe imbarkimit të kompanisë amerikane Collins Aerospace, degë e gjigantit të industrisë ajrore dhe mbrojtjes RTX.

Problemet nisën të premten, duke ndërprerë funksionimin e softuerit automatik të përdorur nga shumë linja ajrore ndërkombëtare. Prej atëherë, aeroportet në Heathrow të Londrës, Bruksel, Dublin dhe Berlin kanë raportuar ndërprerje të shërbimeve dhe vonesa masive.

Agjencia e Sigurisë Kibernetike të BE-së konfirmoi se Collins ishte viktimë e një sulmi ransomware, një formë agresioni ku hakerët bllokojnë sistemet dhe kërkojnë shpërblim për rikthimin e tyre. Aktualisht, personeli i linjave ajrore është detyruar të kryejë përpunim manual të pasagjerëve dhe bagazheve, duke rritur kaosin në terminale.

Kompania tha të hënën se po punonte ngushtë me katër aeroporte dhe linja ajrore të prekura, ndërsa përditësimet e sigurisë janë në fazat përfundimtare.

Sipas “The Guardian”, dyshimet e para lidhen me mundësinë e një sulmi të sponsorizuar nga shteti. Jonathan Hall KC, vlerësues i pavarur i qeverisë britanike për legjislacionin kundër terrorizmit, deklaroi për “Times Radio”:

“Çdo gjë është e mundur”, kur u pyet nëse Rusia apo një shtet tjetër mund të qëndronte pas sulmit.

Ndërkohë, autoritetet europiane paralajmërojnë se efektet e plotë të sulmit mund të zgjasin edhe disa ditë, deri në rikthimin e plotë të funksionalitetit të sistemeve.