Një sulm kibernetik që goditi softuerin e Collins Aerospace, kompani furnizuese e sistemeve të regjistrimit dhe hipjes në bord, ka shkaktuar kaos në disa nga aeroportet më të mëdha të Evropës.

London Heathrow, Brukseli dhe Berlini ishin ndër më të prekurit, ku regjistrimi i pasagjerëve u krye manualisht, duke shkaktuar radhë të gjata, vonesa të mëdha dhe anulime masive.

Autoritetet belge njoftuan se gjysma e fluturimeve të planifikuara për të dielën, më 21 shtator, do të anulohen, për të shmangur kolapsin e plotë të aeroportit. Eurocontrol, agjencia evropiane e trafikut ajror, i kërkoi linjave ajrore që të reduktojnë fluturimet, ndërsa situata pritet të normalizohet vetëm të hënën në mëngjes.

Në Heathrow, qindra fluturime u anuluan ose u prekën nga ndërprerjet, ndërsa në Bruksel që nga ora 11:00 u raportuan 10 fluturime të anuluara dhe 15 të tjera me vonesa mbi një orë.

Kompania mëmë, RTX, konfirmoi se bëhet fjalë për një “ndërprerje të lidhur me një sulm kibernetik”, por pa dhënë detaje se cilat aeroporte janë prekur saktësisht. Hetimet vijojnë, ndërsa autoritetet paralajmërojnë se pasojat operative do të zgjasin edhe ditët në vijim.