Kryetari i komunës Haraçinë në Kumanovë të Maqedonisë së Veriut, shqiptari Ridvan Ibrahimi u sulmua me armë mesditën e sotme (1 prill 2024). Ministria e Brendshme informon se një person me kallashnikov ka qëlluar drejt kryetarit të komunës së Haraçinës, i cili ishte në shoqëri të disa persona të tjerë. Dy bashkëpunëtorë të tij, shoferi dhe një tjetër nëpunës i komunës, konkretisht Eshtref Selimi dhe Adnan Ajdini, janë plagosur në incident.

Vetë Ridvan Ibrahimi shpëtoi nga plumbat. Autori i sulmit ka qëlluar me rreth 20 plumba dhe më pas ka ikur me një automjet tip ‘Golf’ në drejtimin e rrugës Haraçinë-Kumanovë. Motivet e këtij incidenti ende janë të paqarta.

“Sot, më 1 prill 2024, në orën 13:25 në stacionin policor në Shkup është denoncuar se në hyrje të Haraçinës, një person mashkull me kallashnikov ka gjuajtur ndaj kryetarit të komunës së Haraçinës, Ridvan Ibrahimi, i cili ishte në shoqëri të disa persona të tjerë. Janë plagosur dy persona, që kanë qenë bashkë me kryetarin e komunës. Kryetari nuk është plagosur, ndërsa nuk janë të vërteta as spekulimet e publikuara në një pjesë të portaleve se është plagosur edhe një polic. SPB Shkup po ndërmerr masa për zbardhjen e rastit,” informon Ministria e Brendshme e Maqedonisë.