Të paktën pesë persona kanë humbur jetën dhe 22 të tjerë janë plagosur në një sulm të përgjakshëm ndaj selisë së kompanisë shtetërore Turkish Aerospace Industries (TUSAS) pranë kryeqytetit turk, Ankara. Presidenti Rexhep Tajip Erdogan konfirmoi numrin e viktimave dhe e dënoi ashpër atë që e quajti “sulm të tmerrshëm terrorist”.

Sulmi ndodhi të mërkurën, ndërsa presidenti Erdogan po zhvillonte bisedime me Vladimir Putin në Rusi. Sipas ministrit të Brendshëm, Ali Yerlikaya, dy sulmues u neutralizuan gjatë incidentit, përfshirë një mashkull dhe një femër që ishin mes të vrarëve.

Sulmi ndodhi në orën 15:30 me kohën lokale (12:30 GMT) në Kahramankazan, një qytet i vogël rreth 40 kilometra në veri të Ankarasë. Pamjet nga vendi i ngjarjes të transmetuara nga mediat lokale treguan re të mëdha tymi dhe flakë të fuqishme, pas një shpërthimi dhe shkëmbimit të zjarrit.

Kamerat e sigurisë kapën imazhe të një burri me një çantë shpine dhe një pushkë sulmi, ndërsa u raportua gjithashtu për një grua të armatosur. Raportimet sugjeruan se tre sulmues ishin përfshirë në sulm, dhe ka pretendime se disa punëtorë janë marrë peng.

Ekspertët sugjerojnë se ky ishte një sulm terrorist i planifikuar mirë, pasi sulmuesit duket se kishin informacion për ndërtesën dhe hyrjet e saj.

Ndonëse nuk ka pasur një marrje të menjëhershme të përgjegjësisë, ministri i drejtësisë ka hapur një hetim. Autoritetet turke kanë ngritur akuza ndaj Partisë së jashtëligjshme të Punëtorëve të Kurdistanit (PKK), e cila ka zhvilluar një kryengritje të gjatë kundër qeverisë turke.