Të paktën një person humbi jetën dhe shtatë të tjerë u plagosën pas sulmeve ajrore izraelite në Libanin jugor, të enjten. Ushtria izraelite tha se kishte goditur infrastrukturën terroriste të Hezbollahut, por presidenti libanez Joseph Aoun deklaroi se objektivat ishin “vendndodhje politike”, duke e cilësuar ngjarjen si një shkelje të re të armëpushimit të arritur vitin e kaluar.

Sipas Ministrisë së Shëndetësisë së Libanit, viktima u regjistrua në qytetin lindor të Smistar, ndërsa një person u plagos në Bnaaful, në rajonin jugperëndimor të Saidës, dhe gjashtë të tjerë në Ansar, në rajonin jugor të Nabatieh.

“Sulmet e vazhdueshme izraelite janë pjesë e një politike sistematike që synon shkatërrimin e infrastrukturës prodhuese, pengimin e rimëkëmbjes ekonomike dhe minimin e stabilitetit kombëtar nën pretekste të rreme sigurie,” – tha presidenti Aoun.

Nga ana tjetër, ushtria izraelite deklaroi se “goditi infrastrukturën terroriste të Hezbollahut (…) në rajonin Mazraat Sinai”, duke shtuar se objektivat përfshinin strukturat e organizatës Green Without Borders, një OJQ e sanksionuar nga SHBA që sipas Izraelit “operon si mbulesë politike për Hezbollahun” pranë kufirit izraelit.

Tensionet mes Izraelit dhe Hezbollahut janë rritur ndjeshëm muajt e fundit, pavarësisht marrëveshjes së armëpushimit të nëntorit 2024, e cila kishte ndërprerë një luftë dy-mujore në kufirin mes dy vendeve. Izraeli ka bombarduar pothuajse çdo ditë zona të jugut të Libanit, duke e justifikuar me kërcënimet e vazhdueshme të Hezbollahut, ndërsa Bejruti akuzon Tel Avivin për agresion të qëllimshëm ndaj infrastrukturës civile.