Një sulm ajror i forcave izraelite ka goditur më 29 dhjetor spitalin Al-Wafa në Qytetin e Gazës, duke vrarë të paktën shtatë persona, sipas agjencisë për mbrojtje civile në Gazë. Ushtria izraelite ka deklaruar se sulmi kishte për qëllim militantët e Hamasit që po operonin nga një qendër komanduese brenda ndërtesës, e cila, sipas tyre, nuk ishte më funksionale si spital.

Ministria e Shëndetësisë në Gazë ka thënë se spitali Al-Wafa ende ofron shërbime, duke u kujdesur për pacientët me të meta fizike, dhe se sulmi ka goditur katet e sipërme të ndërtesës. Ushtria izraelite theksoi se sulmi ishte një “sulm preciz” i shënjestruar për të goditur pjesëtarët e një ekipi të mbrojtjes ajrore të Hamasit.

Ky sulm erdhi një ditë pas një tjetër sulmi ajror izraelit në spitalin Kamal Adwan në veri të Gazës, ku Organizata Botërore e Shëndetësisë raportoi se pacientët dhe stafi ishin detyruar të largoheshin nga ndërtesa.

Ushtria izraelite ka arrestuar drejtorin e spitalit Al-Wafa, Hossam Abu Safiyeh, duke e akuzuar si anëtar të Hamasit. Që nga 6 tetori i këtij viti, Izraeli ka intensifikuar operacionet ushtarake në veri të Gazës, duke thënë se po synon të parandalojë rigrupimin e Hamasit, ndërkohë që sulmet ajrore dhe granatimet vazhdojnë edhe në pjesë të tjera të enklavës palestineze.