Policia e Shtetit ka konfirmuar një sulm të ndodhur në natën e Krishtlindjeve, më 25 dhjetor 2024, ndaj godinës kryesore të “One Telecommunications”, ku ndodhen serverët qendrorë të kompanisë, si për komunikimet ashtu edhe për financën.

Sipas Drejtorisë Vendore të Policisë Tiranë, hetimet çuan në procedimin penal të 7 punonjësve të sigurisë fizike dhe një drejtuesi të kompanisë telefonike. Ngjarja nuk ishte raportuar më parë në organet ligjzbatuese, duke ngritur dyshime për përfshirje në moskallëzimin e krimit dhe veprime që pengojnë zbulimin e së vërtetës.

Detajet e ngjarjes

Sipas hetimeve paraprake, rreth orës 02:30 të datës 25 dhjetor, dy persona të maskuar kanë hyrë në ambientet e kompanisë përmes derës së pasme, duke dëmtuar drynin.

Punonjësi i sigurisë që konstatoi incidentin, G.K, deklaroi se nuk janë marrë sende dhe nuk ka dëme materiale, por nuk ka njoftuar policinë, duke informuar vetëm drejtuesit teknikë dhe punonjësit e shoqërisë private të sigurisë fizike “Nazeri”, që kishte në ruajtje ambientet e kompanisë.

Gjithashtu, hetimet zbuluan se edhe përfaqësues të kompanisë “One Telecommunications” kishin dijeni për ngjarjen, por nuk e kishin raportuar në organet kompetente.

Të proceduarit penalë

Në përfundim të veprimeve procedurale, Komisariati i Policisë Nr. 3 referoi materialet në Prokurori, duke filluar procedim penal për:

“Moskallëzim të krimit” dhe “Veprime që pengojnë zbulimin e së vërtetës” ndaj:

• Erald Sina, drejtues i Departamentit dhe Pasurisë së kompanisë

• Gentian Koçi, përgjegjës sigurie i kompanisë

• Alfred Zylalaj, përgjegjës sigurie i kompanisë “Nazeri”

• Ismet Tartari, punonjës sigurie i kompanisë “Nazeri”

• Koço Veneci, punonjës sigurie i kompanisë “Nazeri”

• Zafer Dinushi, punonjës sigurie i kompanisë “Nazeri”

“Moskallëzim të krimit” ndaj:

• Dy punonjësve të sigurisë së brendshme të kompanisë, G.K. (50 vjeç) dhe A.F. (31 vjeç)

• Drejtuesit të Departamentit të Zyrave dhe Pasurisë, E.S. (38 vjeç)

• Drejtuesit teknik dhe katër punonjësve të kompanisë private të sigurisë fizike, A.Z. (54 vjeç), G.S. (40 vjeç), K.V. (63 vjeç), M.D. (55 vjeç) dhe I.T. (62 vjeç)

Dyshimet për fshirjen e të dhënave që lidhen me hetimet ndaj Veliajt

Sulmi ndaj serverëve të “One Telecommunications” ndodhi në një periudhë të ndjeshme, kur SPAK po hetonte lidhjet e kësaj kompanie me kryetarin e Bashkisë së Tiranës, Erion Veliaj, dhe vëllain e tij, Arbër Veliaj, për afera të dyshimta financiare.

Mosraportimi i ngjarjes, si dhe dyshimet për ndërhyrje në serverët qendrorë, kanë ngritur hipoteza mbi një tentativë për të fshirë të dhëna që mund të kishin rëndësi për hetimet e Prokurorisë së Posaçme.

Hetimet po vazhdojnë për identifikimin e autorëve dhe verifikimin e plotë të rrethanave të ngjarjes.