Të shtënat pranë Shtëpisë së Bardhë kanë tronditur Uashingtonin dhe opinionin publik amerikan. Presidenti Donald Trump e cilësoi sulmin si një “akt terrori”, ndërsa autoritetet po hetojnë me intensitet të lartë motivet e ngjarjes.

Si ndodhi sulmi?

Pasditen e së mërkurës, sipas autoriteteve amerikane, një shtetas afgan hapi zjarr ndaj dy anëtarëve të Gardës Kombëtare në qendër të Uashingtonit, vetëm dy blloqe larg Shtëpisë së Bardhë, pranë zonës së njohur Farragut Square. Të dy gardistët u plagosën rëndë.

Kryetarja e Bashkisë, Muriel Bowser, e përshkroi ngjarjen si “një sulm të synuar”, duke theksuar se zona ishte e mbrojtur dhe e patrulluar në mënyrë intensive.

Si reaguan forcat e sigurisë?

Njëri prej gardistëve arriti të kundërpërgjigjej me armë, duke goditur autorin e dyshuar. Ai ndodhet nën kujdes mjekësor në spital. Policia konfirmoi se bëhet fjalë për një autor të vetëm.

Dy gardistët e plagosur, pjesë e trupave nga Virxhinias Perëndimore, ishin dislokuar në kryeqytet me urdhër të Presidentit Trump. FBI dhe autoritetet e qytetit deklaruan se të dy gjenden në gjendje kritike.

Kush është autori i dyshuar?

Presidenti Trump njoftoi se agresori është një shtetas afgan i ardhur në SHBA në vitin 2021. Ai e cilësoi ngjarjen si terrorizëm, duke thënë se vendi “nuk do të tolerojë akte të tilla të së keqes”.

Edhe FBI po e heton incidentin si një sulm të mundshëm terrorist, ndërsa mbetet ende i paqartë motivi i autorit.

Trump: “Një akt i së keqes, një akt urrejtjeje”

Në fjalimin e tij, Presidenti u shpreh me tone të forta:

“Ky sulm i neveritshëm ishte një akt i së keqes, një akt urrejtjeje dhe një akt terrori.”

Ai nuk dha detaje të tjera mbi hetimet apo motivet e sulmit, duke e lënë çështjen në duart e FBI-së dhe agjencive të sigurisë.

Hetimet vazhdojnë, ndërsa Uashingtoni mbetet nën masa të rrepta sigurie pas një prej incidenteve më serioze pranë Shtëpisë së Bardhë në vitet e fundit.