TIRANË – Deputetja e Partisë Demokratike, Jorida Tabaku, ka ngritur akuza të drejtpërdrejta ndaj mazhorancës socialiste për mungesë transparence dhe bllokim të projektligjeve të propozuara nga opozita, duke e cilësuar këtë një tregues të mungesës së vullnetit politik për të çuar përpara procesin e integrimit europian.

Gjatë fjalës së saj në Kuvend, Tabaku theksoi se prej një viti ka paraqitur tre projektligje, të cilat nuk janë futur asnjëherë në rendin e ditës për diskutim. Sipas saj, kjo është një praktikë e përsëritur nga maxhoranca për të shmangur debatet e nevojshme parlamentare mbi çështje me rëndësi kombëtare dhe ndërkombëtare.

“Anëtarët e maxhorancës në Komisionin e Çështjeve Europiane nuk vijnë kur duhet të miratohen ligje. Edhe ligjet që janë gati, nuk i vendosni në rendin e ditës. PD ka mbi 60 iniciativa që nuk diskutohen”, deklaroi deputetja demokrate.

Tabaku kritikoi gjithashtu mungesën e debatit institucional mbi raportin e Komisionit të Jashtëm të Parlamentit Europian dhe raportin e OSBE-së për zgjedhjet në Shqipëri. Ajo paralajmëroi se pa diskutim të hapur mbi zgjedhjet dhe standardet demokratike, procesi i integrimit europian mbetet i bllokuar.

“Nuk ka integrim europian pa diskutuar zgjedhjet dhe diskutimet në PE. Nuk ka vullnet politik për të çuar përpara gjërat. Kjo është një strategji e qëllimshme për të shmangur përgjegjësitë dhe për të mbyllur gojën e opozitës”, përfundoi Tabaku.

Kjo deklaratë vjen në një kohë kur Parlamenti pritet të mbyllë punimet para pushimeve verore, ndërsa shumë projektligje të propozuara nga opozita mbeten të pazbardhura.