Deputetja e Partisë Demokratike, Jorida Tabaku, prezantoi sot në Komisionin për Evropën dhe Punët e Jashtme ndryshimet në Kodin Penal për mbrojtjen e gazetarëve dhe lirinë e medias, duke propozuar dekriminalizimin e plotë të fyerjes dhe shpifjes.

Tabaku theksoi se grupi i ekspertëve, në konsultim me organizatat e shoqërisë civile dhe në përputhje me rekomandimet e Komisionit Evropian, ka sugjeruar shfuqizimin e plotë të nenit 119 dhe 120 të Kodit Penal. Deputetja kritikon qeverinë për ndryshimet e pjesshme, duke lënë të paprekur nenin 119, që lidhet me fyerjen.

“Qeveria shqiptare mendon se mund t’i fyejë gazetarët dhe ka lënë nenin 119 ashtu të paprekur,” tha Tabaku, duke shtuar se ndryshimet për nenin 120 janë praktikisht të pazbatueshme për shkak të mungesës së organizatave të regjistruara që mund të përfitojnë nga ligji.

Deputetja nënvizoi se Shqipëria mbetet pas vendeve të rajonit në këtë drejtim dhe se procesi i integrimit evropian kërkon reforma reale dhe jo ligje vetëm në letër. Ajo theksoi nevojën për masa konkrete që të garantojnë sigurinë dhe mbrojtjen e gazetarëve.

Në përfundim, Komisioni për Evropën dhe Punët e Jashtme rrëzoi projektligjin e propozuar nga Jorida Tabaku, duke lënë të hapur nevojën për debat dhe reformë të mëtejshme në mbrojtje të lirisë së medias në vend.